الى اخواني الكوتيين وخواتي الكويتيات ؟؟؟؟

[aljenaan]

بسم الله الرحمن الرحيم

السلام عليكم ورحمة الله وبركاته

هذا الحوار حصل معاي مع احد اصحابي في العمل وهو يحمل الجنسيه الكويتيه

وذكر لنا موضوع لم اتخيله في راسي ابدا وحبيت اعرض هذا الموضوع لكي اتعرف اكثر من اخواننا الكويتيين هل هو صحيح ام لا او من اي عضو يعلم بهذا الخبر


الحووووووار



كان الحوار يدور بين الزواجات في الكويت وفي السعوديه وليس بينهم فوارق ولكن حين ذكر ان هناك الكثير من العوائل او القبائل الكويتيه ان اهل العروس لا يذهبوووون الى زواج ابنتهم وهذا ما يسمونه عار عليهم او عيب كبير



او بمعنى اخر لا يستطيع ان يرفع عينه امام اهل العريس ولا احد يذهب من اهل العروس الى عرسها سواها


هل هذا صحيح مع ان زميلي كان يؤكد ميه بالميه عن الموضوع ولكن اريد ان اعرف او نناقش هذا الموضوع معكم هل ما زالت هذه العادات موجوده عندكم



انتظر ردودكم


اخوكم الجنان

[فهدبن]

الكلام غير صحيح
لا في السعوديه
ولا في الكويت
بل اهل العروس هم الذين يحجزون قصر الافراح
ويستقبلو المدعوين

[بحـــر]

لا كلامه صحيح الجنان

وممكن تسئل اي شخص من قبيلة شمر وتستفيد اكثر
لان بعض الفخوذ تعمل الطريقه هذي عدم مرافقة العروسه

وسب عدم مرافقة العروسه هو (ان ضنهم فتح بكارة البنت وهم موجودين عندهم عيب
وشكرا

[aljenaan]

تشكر اخوي فهد بن على مرورك الكريم

وممكن انك ما سمعت الموضوع هذا لكن انا سمعته من كذا شخص وعشان كذا حبيت اخاطب اخواني الكويتيين بسأن هذا الموضوع


تسلم اخوي بحر على ردك وانتظر اخواني الكويتيين


اخوكم الجنان

[Maryam]

[/b]هذا صحيح ايها الاحبه و لكن هذا الموضوع والمناقشه فيه تختلف من عائله لعائله و من تقاليد الى اخرى..
ولكن اريد ان اقول لكم الشئ الذي شهدته في عائلتنا..
فقد تزوجت اختي ولم يحضر والدي الى زفافها و هذا شئ متعارف و متفق عليه عندنا..
واريد ان اؤكد لكم انه فقط والدي لم يحضر الزفاف, اما باقي افراد العائله فقد حضرته..
وقد حدث نفس الشئ معي عندما تزوجت..

لا ادري ماذا تكون ردود فعل الاخرين عند قراءة هذا الموضوع, و لكن هكذا هو المجتمع و هذه هي العادات و التقاليد..


دمتم في رعاية الله...

[برورة]

والله انا اول مره اسمع بهالكلام عندنا بالكويت
وانا حاضره عرس شمر
ومطران ورشايده
واغلبية القبايل
وهالتقليد مو موجود عندنا احنا الحضر
انا حيل استغربت ليم قريت الموضوع
والله هذا اللي قالك يا اخوي الجنان دازها عليك
او بالاحرى يعيش بالصحراء:)
مع احترامي

[aljenaan]

هلا فيك اختي مريم

انا لما كتبت هذا الموضوع كنت متأكد من صحته تماما ولكن كنت اريد ان اتعرف اكثر عليه وهو ليس عيب بحد ذاته انما كما ذكرتي انتي انها عادات وتقاليد بعض العوائل


اختي بروره تسلمين على مرورك وردك وانتي تقولين انك اول مره تسمعينها وقد اكدت لك اختي مريم الشيء هذا انه حاصل معاها ومع اختها يعني المفروض تتأكدين منه اكثر واكثر


تحياتي لكم


واتمنى من كان يملك اي معلومات اكثر عن بعض عادات وتقاليد العرب في اي مكان ليس بالكويت فقط يذكرها لنا لكي نتعرف اكثر


تحياتي لكم


اخوكم الجنان

[سااهر الليل]

اولا / بسم الله الرحمن الرحيم

هذه العاده التي ذكر الاخ الكويتي الذي يعمل معك في العمل ليست الا عاده من عادات فخذ من

فخوذ عنزه وليس لشمر ... وقد حصلت لدينا في عائلتنا في وقت مضى ليس بالبعيد جدا ما يقارب

الثلاث او الاربع السنون الماضيه ... ولكـ تحياتي اخوي المشرف العام


اخوك سااهر الليل

من الحسا

[المهند]

السلام عليكم ورحمة الله وبركاته :


طرح جيد أخوي [ الجنان ] ...............



الحقيقة أول مرة أسمع هذا الكلام ......... مع أن ليست عندي الخبرة الكافية



في أمور العادات والتقاليد .... يعني خبرة بسيطة ؟


أوافق أخي (( سااهر الليل )) في المضمون



وأقول قد يحصل هذا لكن من فئة بسيطة وقليلة . وعلينا أن لا نعمم الشواذ



نعم إن كانت تعتبر عار وعيب الفرحة فهو أمر شاذ وسامحوني على الكلمة .



و الحمد لله الذي هدانا لنور العم وإتباع الهدي النبوي .

[ZyTooNH]

السلام عليكم جميعا

والله يا جماعه أنا نفسي الى الحين مو فاهمه ولا شي من هالكلام هذا وصار
فيها عادات وتقاليد ومادري شنو بعد قالوا الاخوان فوق دخت من كثر الآراء
لكن كشكل عام ان شاء الله مافي من هالامور تحصل عندنا أو ظاهره عامه
يمكن تكون عادات عند بعض الناس لكن بصفه عامه للكويتيين NoOoOo


وشكرا

[ساهر الليل]

اختي ZyTooNH شكلك كويتيه وانا لست بكويتي

لكن انا قلت ان هالعاده في فخذ من عادات عنزه

وعنزه معروفه بشموخها وعزتها حتى انه فيه مثل

عربي يقول لا اعز من وائل ووائل هذا هو وائل كليب

اخو الزير سالم والذي لم تفهميه هو انه هالعاده وهي

ان ابو البنت لا يحضر ولكن اخوانها يحضرون الزفاف .. " العرس "

وليست الا عاده من عادات كثيره عند كثير من القبائل

ومن يدقق في بعض عادات القبائل يجد العجب العجاب

هذا اللي اقدر اضيفه ... ولكم مني خالص التحايا

اخوكم ... سااهر الليل
من المنطقه الشرقيه

[بدون اسم]

انا بصراحة اول مرة اسمع هذا الكلام..

[ZyTooNH]

الف شكر عزيزي ساهر الليل

وكل احترام وتقدير لكل العادات والتقاليد

الحين فهمت

[ساهر الليل]

لا شكر على واجب ... الواجب على كل انسان انه يبين للناس ...

اللي ما يفهمونه ... وانا بواجبي اشكر الاخ الجنان على طرح الموضوع

تحيااتي للجميع ... سااهر الليل

من المنطقه الشرقيه

[aljenaan]

تسلموووون يا اخوان وخوات على مشاركتكم لهذا الحوار


تحياتي لكم

اخوكم الجنان

[نونو]

انا اووووووووول مره اسمع هذا الكلام
بالعكس احنا عندنا
اذا ماحضر اهل العرررررروس
سوولهم فضيحه

وهذا اللي اعرفه
انامن اهل الجنوب

[الجــــــوري]

السلام عليكم

تحياااتي للجميع

بالنسبة للموضوع انا اول مرة اسمع فيه

وماكو احد عندنا بالكويت يتبع هالاسلوب

اساسا ابو العروس او اخوها والاكثر اخوها اللي يدخل صالة الافراح

ومايطلع من الصاله الا يوصلها للكوشه

والاسلوب ابدا مو عندنا في الكويت

وطول عمري بالكويت ما شفت هالشيء

وتحياااتي

الجوري

[aljenaan]

مشكور على ردودكم



لكن يا اخت الجوري انا طرحت الموضوع بعد ما كلمني واحد من اهل الكويت وبالضبط ساكن في الجهراء وقاااالي ان ابو العروس ما يروح للعرس ولا يعلم احد ان بنته تزوجت


ورديت عليه وقلتله يعني انت ما راح تروح لعرس بنتك زعل ورفع صوته علي وقاااالي مو انا اللي اعزم الناس على عرس وليلة دخلت بنتي قالي اللي يبي البنت يجيء ياخذها لكن انا ما اروح لعرسها



هذا كلامه بالضبط


وعشان كذا انا طرحت الموضوع بالمنتدى

[>شمــــوخ أنثــى<]

السلام عليكم


يعطيك العافيه اخوي المشرف العام ع طرحك هالموضوع


ساهر الليل ...

حبيت ااكد ع كلامك واقول صحصيح ان قبيله عنزة عندها هالعادة

بس الحين اتوقع خفوا يعني الوالد لما اختي تزوجت ماعزم الناس ع عرسها اخواني اللي عزموا لانه عيب عنده بس هو حضر

طبعا مااستغرب لو كانوا اساسا مايحضررون ..

[الجــــــوري]

السلام عليكم

اخوي جنانووو

انا معاك ان عندنا بالكويت ابو العروس مايعزم على عرس بنته

لكن مايمنعه هالشيء من تواجده بالعرس

وبالنسبة لرفيجك حتى اذا كان ساكن بالجهراء هالشيء مايمنع

لكن بالنسبة لمنطقة الجهراء في الكويت ثلاث اربعها بدو ( على راسي كل البدوو طبعا )

وممكن يصير هالشيء

بس بالنسبة لي ماشفت الاسلوب هذا بحيااتي ابدا

بس لاحظت ان اغلب اللي ردوا يقولون ان قبيلة عنزة عندهم هالشيء..( ممكن اعرف اشمعنا هالقبيلة بذات)


تحيااتي لكم

الجوري

[aljenaan]

اهلا اختي الجوري

كيف حالك

ليس قبيلة عنزه بالذات وانا متاكد لهذ الشيء لان رفيجي من قبيله اخرى

تحياتي لك ونتمنى تواصل اكثر كما تعودنا منك


اخوك الجنان

[عــبـــــادي]

يعطيك العافية الجنان على طرح هذا الموضوع

والله انا سمعت مو الكويتين بس وحتى في السعودية بعض الافخاذ لايسترجلون ان يذهبو الى العرس وهذا اسمه جهل لانه اذا مافرحت مع بنتك متى تفرح فيها ومتى تكون مشاركها الفرح



سلامي لك ........................................

[أبوخالد]

سلاااااااااااااااام يا كل من رد على الجنان وسلام لك يا الجنان



أولا : هذه الأشياء لا يمد لها الإسلام بأي صلة .

ثانياً : البنت في عصرنا هذا ليست عاااااااااار يا ناس

ثالثاً : والله ... والله ... والله ... ان هذا الموضوع صار مع واحد من عيال الجماعة ... خليناه يندم لهذا اليوم
على الشعور اللي وجهه لبنته في هذاك اليوم ...... معليش ..






كلامي هذا لكم يا رجال العزة : اذا انت مستعر من الحريم .... لا أشوووووووووفك متزوج .. ترا الحريم مو لكم









أبو خــــــــالد

[بوعبدالرحمن]

عدل ايصير مع بعض الناس ليشش فهل زمن امه شايف با عيوني

[عبيط]

بما اني احب الكويت واهلها راح ارد على الموضوع

باالنسبه لاهل العروس اذا المعرس ماخذ بنت عمه فا اكيد بيحضرون ويقومون باالعرس بعد

لانه ولد عمهم يصير لاكن اذا البنت اخذت واحد غريب او مو من عيال عمها او خالها او او

راح يحضرون لكن مثلهم مثل اي ضيف موجود باالنسبه للرجال

[الدانهm]

انااااااا بصراحه مب اول مره اسمع الموضوع

واناسمعت مثل ماقال اخوي""عبيط "" بس اذا مايقرب المعرس للعروس

ما يحضره ابو العروس فقط حسب ما عرفت اما اخوانها يحضرون



تقبلو من فائق الاحترام

الدانــــــــــــــــــــــــــــmــــــــــه

[مملوحة الخليج]

انا من ناحيتي
اهل السعوديه ما عندهم هاذاالشي


اما اهل الكويت مادري عنهم


ولكم تحيـــــــــــــــ مملوحة الخليج ــــــــــاتي

[ابوسالم]

مملووحه ومن الي قالك الشي هذا ..........


لا فيه في من قبائل السعوديه ...........!,

[ورده]

اخوي الجنان
انا الصراحه استغربت من موضوعك

انا بقولك شي


ترى الافراح تختلف من قبيله الى قبيله
وليس من دوله الى دوله

اخوي الجنان الكلام الي انت قلته
في ناس بالكويت يسون جذي
ولكن هذي قبيله لها عااداتها وتقاليدها

ولكن احنا ناس عايشين بالكويت
ما نسوي مثل الي انت قلته


احنا عندنا نحضر العرس ونقوم بالواجب
ونستقبل الضيوف

وهذي اختلافات من قبيله الى قبيله

[ابو الطيب]

اخوي الجنان

شكرا على طرحك مثل هذا الموضوع للنقاش

وحقيقة غالبية الردود لم تسمع بهذه العادة رغم اختلاف اعمارهم وجنسياتهم وقبائلهم

وانا انظم الى هذه المجموعة ولم اسمع بهذا قط

لأننا مجتمع اسلامي وهذه سنة الحياة واي شخص يقول انه عار او عيب او ذل

ارد عليه شلون انت جيت لهذه الدنيا لو ابوك ما تجوز امك

وليه الخجل وليه وشوله ولماذا وهذا شيء متعارف عليه في جميع الأديان وجميع المجتمعات مع كل الإختلافات التي بينهم منذ خلق الله ابونا ادم وامنا حواء

[aljenaan]

تسلمون يا اخواني على ردودكم

ومشكور لك يا اختي مملوحه واقولك ان هذا الشيء موجود عندنا بالسعوديه ايضا

ومشكور لك يا اختي ورده على ردك ومرورك الكريم



مشكور لك يابو الطيب على مرورك الكريم

واقولك ان هذا الشيء موجود ونسمع به كثير في السعوديه واي دولة عربيه


تحياتي لكم


اخوكم الجنان

[قانص الغزلان]

أخوي الجنان
انا قريت موضوعك وابي ارد عليك رد عام
الموضوع هذا ان اهل العروس ما يحظرون العرس كانت عادة من عادات بعض القبائل بالسعودية سابقاً .. يعني العادة هذي كانت موجودة بصفة عامة سابقاً لكن بمرور الوقت اضمحلت .. اما القول انها كانت لقبيلة شمر فهذي خطأ من ضمن القبائل اللي كانت تسويها مطير وحرب كانو يسوونها سابقاً .. وحتى في القِـدم ماكنوا شمر يسوونها كلهم صحيح غالبهم بس مو كلهم.

اما من ناحية قولك اخواننا الكويتيين .. ايه نعم صح بالكويت ما يحضرون زواج بناتهم و زي ما قلت مو كلهم طبعاً. انا اقصد بدو الكويت (ملاحظة اقصد بكلمة بدو يعني اهل القبايل بالكويت.. لان عندهم العظر هم العيم(العجم) والبدو اهل القبايل) وطبعاً مو البدو كلهم.

و أجيب لكم قصة صارت بيني وبين واحد اماراتي ملخصها كان يقولي ( عندنا البدو العرب مايرضون الهون ولا يرضون على بناتهم الكلمة السيئه حتى ان بعض القبايل عندنا (يقصد عندهم بالامارات) ماترضى تحضر زواج بناتهم يعتبرونه عيب كبير)

وفي الختام اقول كلمة:
الموضوع ماهو سالفة قبيلة الفلان يسوونها وقبيلة الفلان ما يسوونها والا الدولة الفلانيه تسويها والولة الفلانيه ما تسويها الموضوع كله عادات تختلف بين الناس المحافظين والناس المتفتحين( مع اني اخذ ع كلمة متفتحين شوي لانهم يركبون كل شي بالتفتح يعني بالعربي الفصيح يدشرون ويصيعون واخرتها يلزقونها بالتفتح) والكلام موجه للكل لاني شفت احد قال حنا يالـ(حظر ) ما نسويها .. انا اقولك فيه حظر يسوونها واعرف عوائل من اكبر العوائل في الرياض ما يحظرون زواجات بناتهم مع انهم يعتبرون من الناس الحظر .. مو البدو ..

وتقبلو تحياتي:
اخوكم
قنووص

[القرش]

بسم الله الرحمن الرحيم

انا كويتي ومن قبيلة بني هاجر و بالصراحه لم اسمع بهذه العاده نهائيا
مع العلم اني اعتبر هذا غيرصحيحه من حيث المنطق .
لان العروس اختي او بنتي ويجب علي الفرح معها ومشاركتها افراحها.
هذا ولكم جزيل الشكر

[aljenaan]

تحياتي لك اخوي القرش على مشاركتك معانا



وحياك الله انت واهل الكويت كلهم


لنا الشرف اخوي بأنضمامك معنا في ساحة الجنان



تحياتي لك


اخوك الجنان